Identity ကိုတည်ဆောက်မှာလား Unity ကိုတည်ဆောက်မှာလား။
=====================================
ကျွန်တော်တို့ နိုင်ငံတွင် (Identity {အမှတ်သရုပ် လက္ခဏာ}
တည်ဆောက်လိုခြင်း ဟူသည့် စေတနာအမှားကြောင့် Unity {စည်းလုံးညီညွတ်ခြင်း}
မပျက်ပြားစေသင့်ပါ။
---------------------------------------------------------------------------------------------
Identity ဟူသောဝေါဟာရကို ကျွန်တော်တို့ အမှတ်သရုပ်ဟု ဘာသာပြန်ကြသည်။ လူတစ်ဦး
ချင်းစီတွင် အမှတ်သရုပ်ရှိသကဲ့သို့ လူမျိုးတစ်မျိုး၊ တွင်လည်း
အမှတ်သရုပ်ရှိရသည်။ ထိုနည်းတူ နိုင်ငံတစ်နိုင်ငံတွင်လည်း အမှတ်သရုပ်ရှိသည်။
အမှတ်သရုပ်ကို တည်ဆောက်ရာ တွင် နိုင်ငံတစ်နိုင်ငံ၏ ရေခံမြေခံ
သမိုင်းကြောင်း နောက်ခံကို အခြေခံပြီး လုပ်ဆောင်ကြရသည်။ လူမျိုးတစ်မျိုး
ဘာသာစကားတစ်မျိုးတည်ရှိသော နိုင်ငံတွင် Identity တည်ဆောက်ရ လွယ်ကူသည်။
သို့ရာတွင် မြန်မာနိုင်ငံကဲ့သို့သော လူမျိုးပေါင်းစုံ ဘာသာစကားပေါင်းစုံ
ကိုးကွယ်သည့် အယူအဆပေါင်းစုံး ပေါင်းစု တည်ရှိသည့် နိုင်ငံတွင်မူ Identity
တစ်မျိုးတည်ကို တည်ဆောက်ခြင်းငှာမဖြစ်နိုင်သကဲံသို့ လူမျိုးကြီး တစ်ခုတည်း၏ အယူအဆအောက်သို့ သွတ်သွင်းခြင်းငှာ မဖြစ်နိုင်ပါ။ နိုင်ငံအတွင်းမှီတင်းနေထိုင်ကြသော
မတူညီသော ပြည်သူအားလုံး ၏ အမှတ်သရုပ် လက္ခဏာများကို အသိအမှတ်ပြုဖို့လိုသည်။
ထိုသို့မဟုတ်ဘဲ ဘာသာရေးကို အကြောင်းပြု၍သော်လည်းကောင်း လူမျိုးရေးကို
အကြောင်းပြု၍သော်လည်းကောင်း အခြားသော ကိုယ်ကျိုးစီးပွား သံသယများကို
အကြောင်းပြု၍သော်လည်းကောင်း မည်သည့်လူမျိုးဖြစ်၍ မည်သည့် ဘာသာဝင်ဖြစ်၍
ဟူသော အကြောင်းပြချက်ပေါင်းစုံဖြင့် ခွဲခြားဆက်ဆံခြင်းမျိုး၊
ခွဲခြားဆက်ဆံခြင်း မပြုသော်လည်း အခြားသူတို့၏ ရပ်တည်ချက်များကို
ထိပါးပြောဆိုခြင်း တို့ဖြင့် လုပ်ဆောင်နေခြင်းသည် မိမိတို့၏
အမှတ်သရုပ်လက္ခဏာကိုတည်ဆောက်ခြင်းဟု သတ်မှတ်၍ မရပဲ စည်းလုံးမှု ပျက်ပြားအောင်လုပ်ဆောင်နေခြင်းသာ ဖြစ်ပါကြောင်း သတိပြုဆင်ခြင်နိုင်ရန် တင်ပြအပ်ပါသည်။
No comments:
Post a Comment